ხობის მუნიციპალიტეტის მერის პირველი მოადგილე ვარაზ გაბედავა, მერის მოადგილე მახარე ჩოკორაია და საკრებულოს სოციალურ საკითხთა კომისიის თავმჯდომარე დოდო გაბუნია არასამთავრობო ორგანიზაცია „მწვანე მომავლის“ წარმომადგენლებს შეხვდნენ. შეხვედრაზე ურთიერთთანამშრომლობის საკითხებსა და არასამთავრობო ორგანიზაციის მიერ ხობის მუნიციპალიტეტში განხორციელებულ პროექტებზე ისაუბრეს. არასამთავრობო ორგანიზაცია „მწვანე მომავალი“ ხობის მუნიციპალიტეტის ოთხ ადმინისტრაციულ ერთეულში პროექტს - „საქართველოს რეგიონებში განახლებად ენერგიაზე სოფლის მოსახლეობის ხელმისაწვდომობის გაზრდა შესაბამისი ტექნოლოგიების დანერგვისა და გავრცელების გზით” ახორციელებს. პროექტის შესაბამისად, ახალი ხიბულისა და ქარიატის ადმინისტრაციულ ერთეულებში დამონტაჟდა მზის ენერგიაზე მომუშავე ოთხი მოწყობილობა; ხოლო, ხეთისა და საჯიჯაოს საბავშვო ბაღებში სარემონტო სამუშაოების დასრულების შემდეგ, ასევე დამონტაჟდება მზის ენერგიაზე მომუშავე შვიდი წყალგამაცხელებელი კოლექტორი. ორგანიზაციის წარმომადგენლები მუნიციპალიტეტის ადმინისტრაციულ ერთეულებში ადგილობრივ მოსახლეობასთან საინფორმაციო ხასიათის შეხვედრებს მართავდნენ და მათ, პროექტის მიზნებზე და ამოცანებზე აწვდიდნენ ინფორმაციას. „მწვანე მომავალი“ პროექტს გლობალური გარემოსდაცვითი ფონდის (GEF SGP) მცირე გრანტების პროგრამის ფინანსური მხარდაჭერით ახორციელებს.

6-7 დეკემბერს, თბილისში, სასტუმრო „რადისონ ბლუ ივერიაში“, ევროკავშირისა და ევროსაბჭოს ეგიდით, გაიმართა კონფერენცია თემაზე: „ეთიკა და გამჭვირვალობა ადგილობრივ დონეზე: სტრატეგიები და მექანიზმები“. კონფერენციაში ხობის მუნიციპალიტეტის მერი, გოჩა ქაჯაია მონაწილეობდა. ღონისძიება გახსნეს და მონაწილეებს მიმართეს - ევროსაბჭოს ოფისის ხელმძღვანელმა საქართველოში კრისტიან ურსემ, საქართველოს რეგიონული განვითარებისა და ინფრასტრუქტურის მინისტრმა ზურაბ ალავიძემ, ევროკავშირის ელჩმა საქართველოში იანოშ ჰერმანმა, ევროსაბჭოს ადგილობრივი და რეგიონული კონგრესის გენერალურმა მდივანმა ანდრეას კიფერმა, თბილისის მერმა კახი კალაძემ, საქართველოს მთავრობის და საქართველოში ევროკავშირის დელეგაციის წარმომადგენლებმა. ორდღიან სამუშაო სესიებში, აღმოსავლეთ პარტნიორობის შემდეგი ქვეყნები - აზერბაიჯანი, ბელორუსი, მოლდავეთი, საქართველო, სომხეთი და უკრაინა მონაწილეობდნენ. შეხვედრაში მონაწილე ექსპერტებმა და მერებმა, თავიანთ მუნიციპალიტეტში არსებულ გამოწვევებზე იმსჯელეს და ერთამანეთს, საკუთარი გამოცდილება გაუზიარეს. ღონისძიება ადგილობრივი თვითმმართველობის განვითარებას და ადგილობრივი დემოკრატიის ხარისხის ამაღლებას ისახავდა მიზნად.