13 თებერვალს, ხობის მუნიციპალიტეტის გამგებლის პირველმა მოადგილემ ვარაზ გაბედავამ, საკრებულოს თავმჯდომარემ ედიშერ ჯობავამ, მაჟორიტარი დეპუტატის ირაკლი (დაჩი) ბერაიას ბიუროს ხელმძღვანელთან და საკრებულოს წევრებთან ერთად ქალაქ ხობში, კონსტანტინე გამსახურდიას ქუჩაზე გზის სარეაბილიტაციო სამუშაოები დაათვალიერეს. პროექტის ფარგლებში აღნიშნულ ქუჩაზე დაიგება ბეტონის საფარი, მოეწყობა მილხიდები, ეზოებში შესასვლელები და წყალსაწრეტი არხი. პროექტის სახელშეკრულებო ღირებულება 239 ათას ლარს შეადგენს და მას ელექტრონულ ტენდერში გამარჯვებული კომპანია შპს „შარა - გზამშენი პირველი“ ახორციელებს. სამუშაოზე ადგილობრივი მოსახლეობაა დასაქმებული.

13 თებერვლიდან ხობის მუნიციპალიტეტის საზოგადოებრივი ჯანდაცვის ცენტრი, საქართველოს მთავრობის დადგენილებით დამტკიცებული „ც ჰეპატიტის“ მართვის სახელმწიფო პროგრამის ფარგლებში ქ. ხობის (კოსტავას ქუჩა N3), პირველი მაისის, ჭალადიდის, შავ-ღელეს, ახალი ხიბულის, ძველი ხიბულის, ბია, ზემო ქვალონის, ნოჯიხევის, პატარა ფოთის, თორსის საექიმო ამბულატორიებში, ხობის მუნიციპალიტეტის მოსახლეობისთვის მარტივი და სწრაფი ტესტების საშუალებით, „ც ჰეპატიტზე“ ლაბორატორიული გამოკვლევებს ჩაატარებს. ნებისმიერ დაინტერესებულ პირს შეუძლია მიმართოს ზემოთ დასახელებულ სამედიცინო დაწესებულებებს.