ქ. ხობის ცენტრალურ ბიბლიოთეკაში დღეს ლიტერატურულმა კაფემ პოეტ ენვერ სალაყაიას უმასპინძლა, სადაც გაიმართა მისივე წიგნის „სულის ფსკერიდან ცის გუმბათისკენ ანუ უსათაუროები“-ს პრეზენტაცია. ლიტერატურულ საღამოზე ხან ზამთრის სუსხიანმა ქარმა დაუბერა, ხან გაზაფხულის სურნელმა გააბრუა იქ მყოფი ყველა თაობის მსმენელი და... ერთი საათის განმავლობაში, კულტურის ცენტრთან არსებულ გოგონათა ტრიოს მიერ შესრულებული სიმღერების ფონზე ყველა პოეზიით სუნთქავდა. ლიტერატურულ კაფე-საღამოს უძღვებოდნენ კულტურის ცენტრის დირექტორი ბეჟან ნადარაია და ცენტრალური ბიბლიოთეკის თანამშრომელი ქრისტინე ფარცვანია. მოწვეულ სტუმრებს შორის იყვნენ ქ. ხობის სამების სახელობის ტაძრის მოძღვარი მამა კირიონი, ხობის მუნიციპალიტეტის გამგებლის მოადგილე მახარე ჩოკორაია (საჩუქრად პოეტს წიგნი უ.შექსპირის „სონეტები“ გადასცა), გამგეობის კულტურის, განათლების, სპორტის, ძეგლთა დაცვისა და ახალგაზრდულ საქმეთა სამსახურის უფროსი ფერიდე გოგია, პოეტი ლაშა გვასალია და სიყრმის მეგობრები, რომლებმაც დღევანდელი დღე მიულოცეს და წარმატებები უსურვეს პოეტს.